Diego Carbajo
CEICeko kidea, Taldekide Taldearen kidea - GAIT
Diego Carbajo Padilla Soziologian doktorea eta UPV-EHUko Soziologia eta Gizarte Langintza Saileko irakasle atxikia da. Egun, Lan Harremanen eta Giza Baliabideen Graduaren Lanaren Soziologia; Marketin Graduko Kontsumoaren Soziologia eta Soziologia Graduko Zientzia, Teknologia eta Gizartea irakasgaiak irakasten ditu.
EAEko gazteen emantzipazioari buruzko doktore-tesiarekin Eusko Jaurlaritzako Lehendakaritzako “Euskal Gizartearen Egoera 2014” sariaren akzesita lortu zuen. Eusko Jaurlaritzako doktoratu aurreko eta ondoko ikertzailea izan da eta hainbat ikerketa egonaldi egin ditu Erresuma Batuko Cardiff University-n eta Australiako RMIT University-n, hurrenez hurren.
Bere ikerketa-ildo nagusia gazteria, espazioa, prekarietatea eta ekintzailetza kontzeptuen inguruan garatu du. Hartara, EH-ko okupazio-mugimenduari (2007), gazteen lonjen eta lokalen fenomenoari (2012, 2021) eta gazteen emantzipazioaren prekarizazioari (2014) buruzko hainbat lan argitaratu ditu. Ildo horretako artikulu berrienek, “ekintzailetzaren gramatika globalen” nozioaren bitartez, gazteei zuzenduriko ekintzailetza-politiken ondorio subjektiboetan sakontzen dute (2019, 2020 eta 2023).
Bere bigarren ikerketa-ildoren bitartez (aldizkakoa eta auto-finantzatua) soziologiaren mugak tenkatzen saiatzen da. Hortik lan esperimentalagoak eratortzen dira, besteen artean eta Actor-Network-Theory, Science and Technology Studies, Multispecies Ethnography edo Antropozenoaren nozio eztabaidagarrian oinarriturikoak. Ildo honetan praktika artistikoei eta artzain-txakurren lehiaketei buruz (2010), goitibeheren lehiaketen inguruan (2018), edo astoekin lagundutako terapiari buruzko (2022) lanak argitaratu ditu.